Bir iş görüşməsinə hazırlaşarkən diqqət yetirməli olduğunuz bir çox mühüm məqam var. Xüsusilə işlə bağlı nümayiş etdirəcəyiniz davranış, işə qəbul olub-olmamağınızla bağlı əsas amillərdən biridir. Bəs, görüşmənin gedişatını müsbət istiqamətdə dəyişmək və müsahibəni lehinə çevirmək üçün nələr etməlisən?

İşəgötürənlər, adətən iş görüşməsi zamanı namizədin komandaya qatacağı dəyəri görmək istəyirlər. Buna görə də namizəd olaraq işinlə bağlı həqiqi bir peşəkar olduğunu nümayiş etdirməlisən.

Nələr etməlisən?

Dəyərini bil və bunu göstər:
Əgər yeni bir işəgötürəni iş üçün ən yaxşı namizəd olduğunu inandırmaq istəyirsənsə, əvvəlcə özün buna inanmalısan. Öz dəyərini bildiyin zaman, təcrübələrini daha çox özünə güvənərək danışmağa başlayacaqsan. Həyata keçirdiyin bütün işləri ətraflı şəkildə tərcümeyi-halına (CV) yazmaqla ilk addımı ata bilərsən. Əgər karyerada dəyişiklik etmək niyyətindəsənsə, keçmiş təcrübələrindən yeni vəzifəyə uyğun olanları ön plana çıxarmağın daha ağıllı bir seçim olacaqdır.

Müsahibəyə hazır get:
Texnologiyadan uzaq bir sahədən proqramlaşdırma tələb edən bir işə keçirsən? Keçdiyin onlayn kurslara aid sertifikatları asanlıqla görmək üçün CV-yə link əlavə edə bilərsən. Əgər dizaynersənsə, görüşmə öncəsi portfolionu link vasitəsilə paylaşa bilərsən və ya özünlə bir tablet gətirərək işəgötürənə təqdim edə bilərsən.

Sübut təqdim et:
İş üçün uyğun olduğunu göstərməyin digər yolu bunu sübutlarla dəstəkləməkdir. Təcrübələrini nümunələrlə gücləndirərək daha təsirli bir davranış nümayiş etdirə bilərsən.

Müəllimlik etmək üçün müraciət edirsən, lakin rəsmi olaraq müəllimlik təcrübən yoxdur? Rol üçün nə etməyi planladığını əsas götürərək bir tədris planı hazırlaya bilərsən. Çox az təcrübən olmasına baxmayaraq, qrafik dizayn işi ilə maraqlanırsan? Müraciət etdiyin şirkət üçün bir neçə nümunə məhsul hazırlaya bilərsən. İctimaiyyət qarşısında danışma və sosial yardım tələb edən bir vəzifə ilə bağlı görüşürsən? Bu halda qısa, lakin güclü bir mesaj verdiyin videonu paylaşa bilərsən. Ümumilikdə, keçmişdəki uğurlarına əsaslanaraq işəgötürənə dəyərini necə göstərə biləcəyini yaradıcı şəkildə düşünməlisən.

Çatışmazlıqlarını qəbul et:
Hər şeyi bilmədiyini qəbul etməkdə heç bir problem yoxdur. Əksinə, bu həmişə qarşı tərəf üçün daha inandırıcıdır; lakin sərhədləri də bilmək lazımdır. Çətin bir sual verildikdə, sadəcə "Bilmirəm" və ya "Bunu heç etməmişəm" deməməlisən. Bilmədiyini ifadə edərkən, təcrübəli olduğun başqa bir şeyə diqqəti yönəltməyin daha yumşaq bir cavab verməyini təmin edəcəkdir.

Bəlkə mühəndis kimi çalışırsan, amma idarəçilik roluna keçmək istəyirsən... Lakin büdcə təcrübən yoxdur. Belə cavab verə bilərsən: “Hazırkı rolum, büdcəni idarə etmək üçün tələb olunan eyni riyazi səriştəni və detallara böyük diqqət yetirilməsini tələb edir. Buna görə mövcud bacarıqlarıma əsaslanaraq, çatışmazlıqlarımı tez bir zamanda aradan qaldıra biləcəyimə inanıram.”

Mümkün suallara hazırlaş:
Sonda, iş dəyişikliyinin səbəbini necə izah edəcəyini əvvəlcədən hazırlamış olmalısan. Bu mövzuda sual mütləq gələcək və inandırıcı bir cavab verməyin vacibdir.

İnsanlar bu qərarı müxtəlif səbəblərə görə alırlar. Bəlkə işdən çıxarılmısan və ya çalışdığın sahənin gələcəkdə qalmaq istəyəcəyin bir sahə olmadığını anlamısan. Mənfi davranış nümayiş etdirən bir rəhbər, gələcəyi görə bilməmək və s. səbəblər səni bu qərarı almağa məcbur etmiş ola bilər; lakin qərarın mənfi bir səbəbə əsaslanırsa, bunu tam açıqlığı ilə izah etmək məcburiyyətində deyilsən. Müsbət bir baxışla ümumi ifadələrdən istifadə edə bilərsən.

"Universal" bir işçi olduğunu düşünürsənsə, bunu mütləq izah etməlisən. Bacarıqların və təcrübən bir neçə işə uyğunlaşdırıla bilər. Dəyərini nə qədər dəqiq ifadə edə bilsən, şansını da bir o qədər artırarsan.